Першакурсніца крымінальна-выканаўчага факультэта Дар'я Якуніна ўдзельнічае ў розных вакальных конкурсах Беларусі.
Дар'я здолела паказаць сябе на II Рэспубліканскім дзіцячым фестывалі-конкурсе выканаўцаў народнай песні «Жывая крыніца», які праводзіўся ў лістападзе гэтага года.
Дзяўчына - выпускніца Мінскага абласнога кадэцкага вучылішча. Яна пачала займацца вакалам з 6 гадоў, прымала ўдзел у рэспубліканскіх і міжнародных конкурсах, займаючы прызавыя месцы, выйграючы гран-пры.
У гэтым годзе Дар'я прыйшла ў ансамбль народнай песні «Золак», з якім супрацоўнічае факультэт. У складзе гэтага ансамбля курсантка і прыняла ўдзел у фестывалі-конкурсе. Форум сабраў 105 салістаў і 35 ансамбляў з усёй рэспублікі.
Гала-канцэрт праходзіў у Беларускім дзяржаўным універсітэце культуры і мастацтваў. Прадстаўніца Акадэміі МУС выконвала такія народныя песні, як «Віўся хмелюшка» і «А з гары». Выступленне ацэньвалася журы, у склад якога ўвайшлі дзеячы культуры Беларусі, спецыялісты ў галіне народна-песеннай творчасці. Старшынёй з'яўляўся народны артыст Беларусі, лаўрэат дзяржаўных прэмій, прафесар, мастацкі кіраўнік і галоўны дырыжор Дзяржаўнага акадэмічнага народнага хору імя Г. І. Цітовіча Міхаіл Дрынеўскі. Па выніках конкурсу ансамбль «Золак» заняў ганаровае трэцяе месца, а наша Дар'я Якуніна была прынята ў склад фальклорнага ансамбля «Святки».
Канстанцін Валчэцкі,
2 курс,
Аксана Івашнёва,
1 курс.
Фота Аксаны Івашнёвай